హైదరాబాద్:
హైదరాబాద్ జూబ్లీహిల్స్‌లో సంచలనం సృష్టించిన విశ్రాంత ఐపీఎస్ అధికారి వినయ్‌ రంజన్‌ రే భార్య తనూజ హత్య కేసులో పోలీసులు పురోగతి సాధించారు. ఈ దారుణానికి ఒడిగట్టిన నేపాలీ ముఠాను పోలీసులు గుట్టుచప్పుడు కాకుండా అరెస్ట్ చేశారు.
నేపాల్‌లో ప్రధాన నిందితులు అరెస్ట్
కేసు విచారణలో భాగంగా పక్కా సమాచారంతో తెలంగాణ పోలీసు బృందం నేపాల్‌కు వెళ్లింది. అక్కడ నిఘా ఉంచి, హత్య కేసులో ప్రధాన నిందితురాలు కల్పన సహా నలుగురిని అదుపులోకి తీసుకున్నారు. అరెస్ట్ చేసిన నిందితులను రవాణా వారెంట్‌పై హైదరాబాద్‌కు తీసుకొచ్చారు. నగరంలో ప్రాథమిక విచారణ పూర్తయిన అనంతరం, నిందితులను వైద్య పరీక్షల నిమిత్తం ఉస్మానియా జనరల్ ఆస్పత్రికి తరలించారు.
నగల కోసం దారుణ హత్య
ఈ ఏడాది మే 7న జూబ్లీహిల్స్‌లోని నివాసంలో విశ్రాంత ఐపీఎస్ అధికారి భార్య తనూజను ఈ నేపాలీ ముఠా దారుణంగా హత్య చేసింది. ఇంట్లో ఎవరూ లేని సమయం చూసి హత్యకు పాల్పడిన నిందితులు, అనంతరం ఇంట్లోని విలువైన బంగారు నగలు, ఇతర సొత్తును దోచుకుని పరారయ్యారు. హత్య జరిగినప్పటి నుంచి పరారీలో ఉన్న ఈ ముఠాను పోలీసులు చాకచక్యంగా నేపాల్ సరిహద్దుల్లో ఛేజ్ చేసి పట్టుకున్నారు. నిందితులను త్వరలోనే కోర్టులో హాజరుపరచనున్నారు.